Boneiru i ‘Kansen Jeugd’

Boneiru ta un bunita isla den Karibe i for di 10 di òktober 2010 huntu ku Sint-Eustatius i Saba nan ta un parti di Hulanda karibense komo ‘munisipio spesial’. Boneiru ta keda na e parti sur di Laman Karibe, dilanti di kosta di Venesuela. Riba e isla ta biba aproksimadamente 20.000 hende di diferente nashonalidat. Mayoria habitante ta di desendensia antiano, latino òf hulandes. E idioma ku mas ta papiá ta papiamentu pero hulandes ta e idioma ofisial di Boneiru. Ademas bo ta tende hopi spañó i ingles. E isla ta karakterisá su mes pa hende amabel i un esfera trankil. Kultura lokal i kustumbernan ta hunga un ròl importante serka e boneriano. Muzik ta pertenesé na e kultura di e isla i p’esei ta asina importante pa sigui ku e tradishon aki.

For di e rapòrt “Kind op Bonaire, Kinderrechten in Caribisch Nederland” skirbí pa Karin Kloosterboer (2013). E resultadonan ta deskribí tokante di e investigashon di UNICEF di e situashon di muchanan ku ta krese riba e isla di Boneiru, ta remarkabel ku hopi mucha ta reklamá ku tin tiki kos di hasi riba e isla pa mucha di nan edat. Nan ta haña e kantidat di aktividat ku tin muchu limitá i ta haña ku mester hasi muchu mas pa hubentut. ‘Fèrfelá bo mes’ i ‘laf’ ta palabranan ku ta keda ripití. Tin mucha ta konektá e fèrfelamentu di nan mes na kriminalidat hubenil. Muchanan ku no tin nada di hasi, ta bai buska kosnan emoshonante pa hasi ku hopi bia ta resultá den ko’i baldadi i komportashon kriminal.

Profeshonalnan ta haña importante ku tin un reda di protekshon pa muchanan pafó di skol i famia i ta konstatá ku esaki ta falta awor. Si muchanan tin e posibildat pa bai un lugá sigur despues di skol, pasobra no tin niun hende na kas, e ora ei bo por señalá e problema for di un fase trempan i bo ta tene e muchanan for di kaya. P’esei profeshonalnan ta boga pa mas atenshon di polítikonan pa rekreashon, i pa lugánan spesialmente pa mucha manera, fèlt di futbòl i lugánan ku nan por sinta basilá.

Nan ta haña ku mester organisá mas aktividat, tambe via di skol i akohida despues di skol. Enpartikular ta menshoná aktividatnan kultural, musikal i deportivo. Den koperashon ku Ministerio di Hustisia hulandes, e oportunidat a presentá ku e tremendo proyekto di Orkesta pa Mucha por a kuminsá na Boneiru tambe.

Rincon

Pa e programa piloto di orkesta pa mucha a skohe Kolegio San Luis Bertran; e skol básiko na Rincon.

Rincon ta keda na e parti nort di e isla i ta e pueblo/bario mas bieu di Boneiru. Rincon ta keda den e area yen di seru aproksimádamente 20 minüt for di e kapital Kralendijk. Inisialmente a funda Rincon den e vaye entre e serunan, esaki pa mantené for di bista di pirata. Despues e katibunan a bai biba aya. Nan a trese e katibunan aki Boneiru pa traha riba plantashi òf traha na e saliñanan di salu. E katibunan tabata biba na Rincon ku nan famia i na pia tabata kana bai na e saliñanan di salu na e parti sur di e isla, nan tabata keda hinter un siman di trabou aya. Den wikènt nan tabata bin Rincon bèk pa risibí nan ransun (salario) na Mangazina di Rei i bishitá nan famia, pa despues nan bolbe pa e saliñanan.

Awendia prinsipalmente e bonerianonan hende grandi ta biba na Rincon, pasobra e generashonnan mas hóben a bai biba prinsipalmente den e area di Kralendijk. Muchanan ku krese den e bario aki generalmente tin ménos oportunidat, pa motibu di ubikashon di e bario i e distansia for di aktividatnan pa mucha manera skol di muzik, dansa i deporte.