Introdukshon di e Orkesta pa Mucha na Bonieru
Muzik ta kore den e sanger boneriano. For di hopi hóben muzik ta hunga un ròl importante den e kultura boneriano. Na skol a pone materianan kreativo manera arte i muzik na e último lugá i ta duna lèsnan di aritmétika i idioma hopi balor.
E inisiativa ku Orkesta pa Mucha Hulanda a tuma algún aña atrás i ku entretanto el a hiba na e islanan karibense, ke trese un kambio den esaki.
Nos ta konvensí ku materianan kreativo manera tokamentu huntu ta mes importante ku siña konta, skirbi i lesa.
Pa motibu di situashon na kas hopi mucha no ta haña oportunidat pa bai lès di muzik i/òf siña toka un instrumènt. Orkesta pa Mucha ke kambio den esaki i p’esei ta trese ‘skol di muzik’ den klas!
Un proyekto musikal i sosial
Orkesta pa Mucha Boneiru tin komo meta pa duna tur mucha na Boneiru oportunidat pa siña ku tokamentu di un instrumènt musikal i tokamentu huntu ta hopi agradabel!
Ta sientífikamente demostrá ku tokamentu huntu tin un efekto positivo riba inteligensia i abilidatnan sosial di mucha. E efekto aki ta surgi pasobra tokamentu tin un efekto positivo i stimulante riba konekshonnan neuronal den e selebre. Muchanan ku ta toka huntu ta siña traha huntu,apoyá otro, warda riba otro i hopi mas.
Mas tantu aktividat positivo organisá pa mucha, ménos lihé nan ta fèrfelá nan mes. Meskos ku deporte, muzik ta hasi e mucha mas fuerte i mas felis.
Struktura na alkanse di un i tur
Introdusiendo un orkesta pa mucha den skol, nos por krea un struktura asesibel den skol di manera ku tur mucha por haña oportunidat pa deskubrí i desaroyá nan talento musikal. E benifisio ta, ku e lèsnan ta tuma lugá bou di ora di skol.
Tur siman e muchanan ta haña lès di un dosente di muzik animá. Ta kuminsá ku lèsnan di formashon musikal general i lès di kanto i gradualmente ta amplia esaki na e método di Orkesta pa Mucha: toka instrumèntnan huntu den un orkesta di bèrdat!
Na un manera di wega i lihé e muchanan ta siña toka fió, altfió, chèlo, kontrabas, tròmpèt, trombon, klarinèt, korneta, duarsflùit, hobo òf perkushon pa despues nan toka huntu den un orkesta!
Organisashon di e Orkesta pa Mucha na Boneiru ta den man di e organisashon lokal Fundashon Mangazina di Rei.