Siman pasá a entregá 10 tròmpèt, 6 trombon, 6 korneta, 10 duarsflùit, 6 klarinet 10 drùmpad i 8 kontrabas; total 56 instrumènt musikal prosedente di e Instrumentendepot na benefisio di e Orkesta pa Mucha di e muchanan di Kolegio San Luis Bertran na Rincon.

Na luna di febrüari Fundashon Mangazina di Rei a kuminsá ku e promé fase di e proyekto aki. E muchanan a risibí formashon musikal general i lès di kanto. Pasobra e skolnan tabata será pa motibu di medidanan di Corona e lèsnan di Orkesta pa Mucha a para ketu un momentu.

Awor ku nos por bolbe kuminsá ku e lèsnan, entretantu e instrumèntnan tambe a yega i por kuminsá ku e di dos fase. E muchanan ta haña un introdukshon kòrtiku di kada instrumènt pa despues nan por hasi un eskoho di kua instrumènt na ke siña toka. Den e proyekto piloto aki e muchanan ta haña 12 siman di lès. Despues nan tur huntu ta forma un orkesta i huntu ku nan dosentenan nan lo presentá loke nan a siña pa públiko. Probablemente e presentashon aki lo tuma lugá na luna di yüli òf ougùstùs.

Ministerio di Seguridat i Hustisia di Hulanda ta finansiá e proyekto aki. Nan ta kere ku si organisá mas aktividat positivo pa mucha, mas tantu oportunidat nan krea kaminda e muchanan por deskubrí nan talentonan i ménos lihé e muchanan ta bai fèrfelá nan mes. Meskos ku deporte, muzik ta hasi mucha mas fuerte i mas felis. Pa e motibu ei nan ta mas resistente i esei ta forma un bon base pa nan futuro.