Komunikado di prensa. Fin di yanüari e promé orkesta pa mucha na Boneiru a kuminsá na Kolegio San Luis Bertran na Rincon. Orkesta pa Mucha ta un konsepto na Hulanda ku ta funshoná eksitósamente pa 15 aña kaba na diferente skol básiko den diferente suidat. E último añanan a lanta orkestanan pa mucha na Kòrsou i Aruba.

Ku un orkesta pa mucha e muchanan na skol básiko ta haña e oportunidat pa deskubrí kon dushi i mágiko ta pa toka un instrumènt musikal i toka huntu. E vishon ku ta representá e Orkesta pa Mucha ta: demokratisá edukashon musikal. Inisiadó i direktor Marco de Souza ta konta:’Nos ta haña ku muzik ta pa tur hende. Pero edukashon musikal ta asina organisá, ku e ta difísil asesibel i kostoso. Nos ke sòru pa asesibilidat bira hopi mas fásil, di manera ku muchanan den posishonnan desfaborabel tambe tin e oportunidat pa siña toka.’

Banda di siña toka un instrumènt musikal, ta sientífikamente probá ku tokamentu huntu tin efekto positivo riba inteligensia i abilidatnan sosial di mucha. E efekto aki ta krese pasobra tokamentu tin efekto positivo i stimulante riba konekshonnan neuronal den nos selebre. Muchanan ku ta toka huntu ta siña traha huntu, ta konta ku otro, skucha otro, warda riba otro i hopi mas. Pa e motibu aki Ministerio di Seguridat di Hulanda a pone un supsidio inisial disponibel pa realisashon di un Orkesta pa Mucha na Boneiru. Nan ta kere prinsipalmentu ku mas aktividat positivo organisá pa e muchanan, mas oportunidat bo ta krea pa deskubrí nan talentonan i ménos nan ta bai fèrfelá nan mes. Meskos ku deporte, tokamentu ta hasi mucha mas fuerte i mas felis. P’esei nan ta mas resistente i esei ta pone un bon base pa nan futuro.

Fundashon Orkesta pa Mucha Hulanda a aserká Fundashon Mangazina di Rei pa ehekushon di e proyekto piloto di Orkesta pa Mucha na Bonieru. Pa algun aña kaba Mangazina di Rei ta komprometé su mes ku stimulá ekspreshon kreativo i formashon kultural i sosial pa medio di aktividatnan kultural (musikal) pa mucha i hóben. Ku e fin aki e fundashon tin e proyekto Talento Kultural pa algun aña kaminda nan ta eduká mucha i hóben den muzik i baile kultural. Mangazina di Rei ta haña e orkesta pa mucha un atkisishon importante pa e muchanan di Rincon.

Tur mucha di grupo 5 t/k 7 di Kolegio San Luis Bertran ta haña dos ora di lès di kanto pa siman, formashon musikal general i lès di muzik di dosentenan di muzik profeshonal. Nos ta papia di e instrumèntnan: duarsflùit, klarinèt,tròmpèt, trombon, korneta, kontrabas i perkushon. Dennis Aalse (dirigente di e orkesta hubenil na Kòrsou i tambe dosente di muzik na Orkesta pa Mucha Kòrsou), Chaira Borderslee (kantante i dosente di kanto), Victor Felida ( trompetista i dosente di tròmpèt), Franky Yanga (bahista i dosente di kontrabas), Vivian Wensink (dosente di duarsflùit) i Gonsalvo Goeloe (perkushon) ta duna e lèsnan.

E muchanan lo traha pa yega na un presentashon na final di aña eskolar.

E intenshon ta pa hasi e proyekto piloto un gran éksito, di manera ku por lanta un orkesta pa mucha na tur skol na Boneiru.

Di man robes bai man drechi: Heleen Christiaan-Quartel, gerente di entrenamentu i desaroyo na Mangazina di Rei huntu ku Marco de Souza, direktor di Fundashon Orkesta pa Mucha Hulanda.